HOEKOM EK HERE?

Ai, my motor het gebreek en dit gaan my ’n hele klomp geld kos om dit te herstel. Geld wat huidiglik baie skaars is! Hoekom moet dit met my gebeur? Is ek dan nie ’n goeie mens nie? Here, hoekom behandel U my so? Here, hoekom straf U my so? Nou is dit nog die TV en die strykyster , die wasmasjien , die grassnyer en ook die yskas. Hoekom ek Here? Dan is daar nog die gedagtes dat ek nie finansieël beter af is nie. Hoekom is daar ander wat op my ouderdom beter af is? Here, hoekom seën U hulle? Waarom is ek nie ook die geleenthede gegee om welaf te wees nie? Hoekom ek Here?

Dit is wanneer ons so begin dink, dat ons ook aan die anderkant moet gedagtes gee. Here , wat het ek gedoen dat ek ’n motor verdien en TV , strykyster, wasmasjien, grassnyer en yskas? Here, waarom is ek toegelaat om in die land te woon waar ek is? ’n Land wat ryk is en al die benodighede verskaf wat ek nodig het. Ja, ek kon in ’n land gewoon het waar almal arm is, met geen goeie infrastruktuur nie. Hoekom ek Here? Here, ek het ’n werk en goeie gesondheid. Hoekom ek Here? Waarom het U my gespaar van al die stryd en rampe wat ander tref? Hoekom ek Here?

Wanneer ons dink aan die voorregte en seën wat die Here ons mee seën, daagliks, waarom is dit dat ons so kla? Sommige kla oor een of twee persent verhoging in die salaris! Maklik word daar gekla oor die paar ou dingetjies wat so verkeerd gaan in ons lewe!

IS DIT NIE TYD DAT ONS , ONS SEËNINGE TEL NIE?

SPREUKE 10:22  Die seën van die HERE—dit maak ryk, en moeitevolle arbeid voeg daar niks by nie. 

SPREUKE 11:11  Deur die seën van die opregtes kom ‘n stad op, maar deur die mond van die goddelose word dit afgebreek.

SPREUKE 11:25  Die siel wat seën, word versadig; en hy wat laaf, word self ook gelaaf.

GEBED

Here, ek wil elke dag leer om my seëninge te tel, ten spyte van die bietjie ongerief wat ek af en toe ervaar. AMEN